چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مەسروور بارزانی: نابێت هیچ پێکهاتەیەک لە حکوومەتی نوێی عێراق پەراوێز بخرێت
سەرۆکی حکوومەت ڕایگەیاند کە پێویستە کابینەی نوێ بەپێی ئیستحقاقاتە دەستوورییەکان و بە ڕەچاوکردنی پرنسیپی هاوسەنگی و سازان پێکبهێنرێت. ئامانجی ئەم هەوڵانەش دروستکردنی حکومەتێکی خزمەتگوزارە کە بێ جیاوازی مافی هەموو پێکهاتەکان بپارێزێت و کۆتایی بە قەیرانە سیاسییەکان بهێنێت.
لە تەوەرێکی تری کۆبوونەوەکەدا، جەخت لە بایەخی هەماهەنگیی نێوان هێزە سیاسییەکان کرایەوە بۆ تێپەڕاندنی ئەو بەربەستانەی کە ڕێگرن لەبەردەم پرۆسەی سیاسی. هەردوولا هاوڕابوون کە قۆناغی ئێستای عێراق پێویستی بە لێکتێگەیشتنی قووڵ هەیە لەنێوان هەولێر و بەغدا و پێکهاتە سەرەکییەکان، تاوەکو حکومەتێکی وا بێتە کایەوە کە بتوانێت سەقامگیریی سیاسی و ئەمنی بۆ وڵات بگێڕێتەوە.
هەروەها باس لە پێویستیی جێبەجێکردنی ئەو ڕێککەوتنە سیاسییانە کرا کە بنەمای دروستبوونی هاوپەیمانییەکانن، بەتایبەت دابینکردنی شایستە داراییەکانی هەرێمی کوردستان و پاراستنی قەوارەی دەستووریی هەرێم. مەسروور بارزانی ئاماژەی بەوە کرد کە پابەندبوونی لایەنەکان بە دەستوور، کلیلی چارەسەری هەموو کێشە هەڵپەسێردراوەکانی نێوان ناوەند و هەرێمە و متمانەی هاووڵاتیان بە دامەزراوەکان بەهێزتر دەکات.
لە کۆتایی دیدارەکەدا، هەردوولا ئاوڕیان لە دۆخی ناوچەکە و کاریگەریی گۆڕانکارییەکان لەسەر ناوخۆی عێراق دایەوە. جەختیان کردەوە کە یەکڕیزیی نێوان لایەنە نیشتمانییەکان و دوورکەوتنەوە لە سیاسەتی پەراوێزخستن، تەنیا ڕێگەیە بۆ ئەوەی عێراق بتوانێت ڕووبەڕووی تەحەددییە ئابووری و ئەمنییەکان ببێتەوە و ببێتە ناوەندێکی گرنگی سەقامگیری لە ڕۆژهەڵاتی ناوەڕاستدا.
