چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
یەڕێوەبەرایەتیی ئاسایشی هەولێر رایدەگەیەنێت، سێ تۆمەتباریان بەهۆی تەقەکردن لە ئۆتۆمبێلێکی بارهەڵگر لە شارەدێی قوشتەپە دەستگیر کردووە، رووداوەکە بەهۆی کێشەیەکی خێزانییەوە بووە و هیچ زیانێکی گیانی لێ نەکەوتووەتەوە.
ئەمڕۆ پێنجشەممە بەڕێوەبەرایەتیی ئاسایشی هەولێر لە ڕاگەیەندراوێکدا وردەکاریی رووداوێکی تەقەکردنی لە شارەدێی قوشتەپە خستەڕوو.
بەپێی راگەیەنراوەکە: دوای ئەوەی لە چوارڕێیانی قوشتەپە تەقە لە ئۆتۆمبێلێکی بارهەڵگر کرا، هێزەکانی ئاسایش دەستیان بە لێکۆڵینەوە و بەدواداچوون کرد، دەرکەوتووە کە رووداوەکە لەسەر کێشەیەکی کۆمەڵایەتی بووە لەنێوان دوو بنەماڵەدا کە پەیوەندیی خزمایەتی زاوا و خەزوور لەنێوانیاندا هەیە، رووداوەکە هیچ زیانێکی گیانیی لێ نەکەوتووەتەوە.
ئاسایشی هەولێر ئاماژەی بەوەش کردووە: بە فەرمانی دادوەری لێکۆڵینەوەی ئاسایشی هەولێر، سێ تۆمەتبار بە ناوە کورتکراوەکانی (ع. خ. ع) و (ع. ر. خ) و (م. م. خ) دەستگیر کراون، هەروەها دەست بەسەر ئەو چەکانەشدا گیراوە کە لە رووداوەکەدا بەکارهێنراون و لێکۆڵینەوەش لەگەڵیاندا بەردەوامە.
