چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆکوەزیرانی هەرێمی کوردستان و شاندێکی هاوبەشی بانکەکانی بەغداد و ئوردنی کوەیتی دەرفەتەکانی ئەنجامدانی کار و پڕۆژەی هاوبەشیان گفتۆگۆ کرد.
ئێوارەی ئەمڕۆ یەكشەممە، مەسرور بارزانی، سەرۆكوەزیرانی هەرێمی کوردستان پێشوازی لە شاندێکی ئەنجوومەنی بەڕێوەبردنی بانکی بغداد و بانکی ئوردنی کوەیتی کرد.
لە کۆبوونەوەکەدا، کە عەبدولکەریم ئەلکەباریتی سەرۆکوەزیرانی پێشووتری ئوردن و ئەندامی ئەنجوومەنی بەڕێوەبردنی بانکی بەغداد بەشداربوو، گفتوگۆ دەربارەی دەرفەتەکانی ئەنجامدانی کار و پڕۆژەی هاوبەش لەگەڵ حکومەتی هەرێمی کوردستان کران، بەئامانجی پێشخستنی سیستمی بانکی و پەرەپێدانی ئابووروی لە هەرێمی کوردستان.
سەرۆکوەزیران، تیشکی خستەسەر چاکسازییەکانی حکومەتی هەرێمی کوردستان لە سیستمی بانکی و بەدیجیتەڵکردنی خزمەتگوزارییەکان و پارەدانی ئەلیکترۆنی. هاوکات باسی لە بەردەوامبوونی پڕۆژەی هەژماری من کرد و ئاماژەی بەوە دا، لەگەڵ سەرۆکوەزیرانی فیدراڵ و پارێزگاری بانکی ناوەندیی عێراق سەبارەت بە چەند دەستپێشخەرییەکی پەیوەندیدار بە پێشخستنی سیستەمی بانکی لە پەیوەندی دایە.
شاندەکە سەرسامیی خۆیان بەرامبەر ئاستی بەرەوپێشچوونی پڕۆژەی #هەژماری_من و دیدگەی سەرۆكوەزیران لە هەمەجۆرکردنی ئابووری و پێشخستنی سیستەمی بانکی نیشان دا. هەردوولا هاوڕابوون لە سەر گرنگیی پشتیوانیکردنی هەوڵەکانی حکومەتی هەرێمی کوردستان لە بواری چاکسازیی بانکی دا.
بانکەکانی بەغداد و ئوردنی کوەیتی لە گەورەترین بانکە بازرگانییەکانی رۆژهەڵاتی ناوەڕاستن و لە چەند وڵاتێکی عەرەبی لقیان هەیە.
