چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
تاوەکو 1ی مانگی 12 دەبێت مامۆستایانی بەڕێز ڤاکسینیان وەرگرتبێت ئەگەرنا دەبێت هەفتانە پشکنینی PCRی کۆرۆنا بکەن
وەزیری تەندروستی حکومەتی هەرێمی کوردستان رایگەیاند، هیچ پێشنیارێک نیە بۆ داخستنی خوێندنگەکان و دەمێک نیە کە لەگەڵ پارێزگارەکان و لیژنەی باڵای کۆرۆنا تاوتوێ رێکارەکانی کۆرۆنایان کردوە، تاوەکو 1ی مانگی 12 دەبێت مامۆستایانی ڤاکسینیان وەرگرتبێت، ئەگەرنا دەبێت هەفتانە پشکنینی PCRی کۆرۆنا بکەن، فەرمانبەرانیش تا 1-1-2022 مۆڵەتیان هەیە، بۆیە لە ئێستاوە هەمو مامۆستایان و فەرمانبەران ئاگادار دەکەنەوە کە بچن سەردانی سەنتەرەکانی پێدانی ڤاکسین بکەن.
د. سامان بەرزنجی، وەزیری تەندروستی حکومەتی هەرێمی کوردستان ئەمڕۆ نەخۆشخانەی جەمالی حاجی عەلی کردەوە و لە لێدوانێکدا بە رۆژنامەنوسانی راگەیاند، “ئەم پڕۆژەیە ژێرخانی چارەسەرکردن دەباتە قۆناغێکی زۆر پێشکەوتوتر، چونکە دەتوانم بڵێم نەخۆشانی شێرپەنجە پێویستیان بە نەشتەرگەری نابێت لە نەخۆشخانەیەکی ئەهلی و نەخۆشەکان پێشتر دەبو چەند مانگێک لە نۆرەدابن، بەڵام بە کردنەوەی ئەم چوار هۆڵەی نەشتەرگەری پاڵپشتییەکی زۆرباش دەبێت”.
لەبارەی دۆخی کۆرۆناو بەردەوامبونی پڕۆسەی خوێندن، ئاماژەی بەوەکرد، “هیچ پێشنیارێک نیە بۆ داخستنی خوێندنگەکان و دەمێک نیە کە لەگەڵ پارێزگارەکان و لیژنەی باڵای کۆرۆنا تاوتوێ رێکارەکانی کۆرۆنامان کردوە، تاوەکو 1ی مانگی 12 دەبێت مامۆستایانی بەڕێز ڤاکسینیان وەرگرتبێت ئەگەرنا دەبێت هەفتانە پشکنینی PCRی کۆرۆنا بکەن، فەرمانبەرانیش تا 1-1-2022 مۆڵەتە، بۆیە لە ئێستاوە هەمو مامۆستایان و فەرمانبەران ئاگادار دەکەینەوە کە بچن سەردانی سەنتەرەکانی پێدانی ڤاکسین بکەن، لە دوێنێشەویشەوە 45 تیمی گەڕۆک بۆ شوێنە قەرەباڵغەکان دەست بکاربون”.
