پارتی نامه‌یه‌ك ئاڕاسته‌ی په‌رله‌مانی عێراق ده‌كات

له‌باره‌ی‌ یاسای‌ دادگای‌ فیدڕاڵی‌ له‌ عێراق، فراكسیۆنی‌ پارتی‌ دیموكراتی‌ كوردستان نامه‌یه‌ك ئاراسته‌ی‌ ئه‌نجوومه‌نی‌ نوێنه‌رانی‌ عێراق ده‌كات.

فراكسیۆنی‌ پارتی‌ له‌ په‌رله‌مانی‌ عێراق له‌ نامه‌كه‌دا داوا ده‌كه‌ن كه‌ پره‌نسیپی هاوبه‌شی و هاوسه‌نگی و ته‌وافووقی له‌ په‌سندكردنی هه‌مواری یاسای دادگای باڵای ئیتیحادی جێبه‌جێ بكرێ‌.

” كورد هاوبه‌شی راسته‌قینه‌ن له‌م وڵاته‌دا، مێژووی نزیك دووپات ده‌كاته‌وه‌ له‌سه‌ر ئه‌وه‌ی كورد ھۆكاری سه‌قامگیری نیشتیمانی بوونه‌ و ناكرێت سیاسه‌تی فه‌رامۆشكردن و په‌راوێزكردن پێڕه‌و بكرێت، چونكه‌ بێگومان ئه‌وه‌ خزمه‌ت به‌ به‌رژه‌وه‌ندی عێراقییه‌كان ناكات” له‌نامه‌كه‌ی‌ فراكسیۆنه‌كه‌ی‌ پارتی‌ وا نووسراوه‌.

فراكسیۆنی‌ پارتی‌ نووسیویانه‌ “داوا ده‌كه‌ین مافه‌كانمان دابین بكرێن و درووستكردن و پێكھاتنی دادگا به‌ كۆده‌نگی دادوه‌ره‌ بنه‌ڕه‌تییه‌كان بێت و به‌پێچه‌وانه‌كه‌شی ھه‌موو ئه‌وانه‌ی به‌شداری ده‌كه‌ن به‌رپرسیارییه‌تی مێژوویی و ته‌واوی لێكه‌وته‌كانی ھه‌ڵده‌گرن”.

ئه‌وه‌ له‌كاتێكدایه‌ كه‌ بڕیاره‌ په‌رله‌مانی‌ عێراق ده‌نگ له‌سه‌ر پڕۆژه‌ یاسای دادگای‌ فیدڕاڵی‌ عێراق بدات و كوردیش به‌نیازه‌ له‌به‌رانبه‌ردا یه‌كده‌نگ و یه‌ك هه‌ڵوێست بن.