چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەمڕۆ سێشەممە نوێنەری ئەمریكا لە نەتەوە یەكگرتووەكان هێرشە تیرۆریستییەكەی دوێنێ شەوی سەر شاری هەولێری سەركۆنە كرد و رایگەیاند پێویستە ڕووبەڕووی ئەو میلیشیایانەی عێراق ببینەوە كە لەلایەن ئێرانەوە پشتیوانی دەكرێن.
ریچارد میڵز نوێنەری ئەمریكا لە نەتەوە یەكگرتووەكان لە میانی دانیشتنی ئەمڕۆی نێردەی نەتەوە یەكگرتووەكان لە عێراق، لەبەردەم ئەنجوومەنی ئاسایشی نێودەوڵەتیدا گوتی “پێویستە ڕووبەڕووی میلیشیاكانی سەر بە ئێران لە عێراق ببینەوە، لەمبارەیەشەوە ئیدارەی سەرۆك جۆ بایدن پلانی ستراتیژی هەیە بۆ ئەوەی سەقامگیری لە عێراق بچەسپێت”.
بەپێی هەواڵێكی كەناڵی (ئەلحورە)ی ئەمریكی، میڵز هەروەها ئەوەشی گوتووە كە راپۆرتی نێردەی نەتەوە یەكگرتووەكان لە عێراق گوزارشت لە دۆخی ئاڵۆزی ناوخۆی عێراق دەكات، لەمبارەیەوە ئەمریكا هەموو هاوكارییەك پێشكەشی دەسەڵاتەكانی عێراق دەكات.
