چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەندامێكی سەركردایەتیی پارتی دیموكراتی كوردستان وەڵامی میدیای سەردەستەی تاقمی خۆفرۆشی ١٦ی ئۆكتۆبەری دایەوە و رای گەیاند كە بەبێ لاهوور جەنگی كەس لە سلێمانی ناتوانێت تەقە بكات، بۆیە سەردانیكردنی دوو ماڵ پەرێزی لە كوشتنی ڕۆڵەی خەڵك پاك ناكاتەوە.
عەلی عەونی، ئه‌ندامى سه‌ركردایه‌تیی پارتى، ڕاگه‌یاند: ”ئه‌و قسانه‌ى پەیج و ماڵپەڕە ئاست نزمەكانی لاهوور، منداڵیش باوەڕیان پێ ناكات و باشترە واز لەم قسە بێسەروبەرانە بێنێت“.
ڕوونیشی كردەوە كە هیچ بەرپرسێكی ئەمنی و ئیداری بە تەواوی فەرمانی حكوومەتی هەرێمی كوردستان و وەزارەتی ناوخۆ جێبەجێ ناكەن، ”ئەوان هەموو ڕۆژێك بە ڕێگەی قاچاخ لە مەرزەكانەوە خواردنی ماوەبەسەرچوو و خراپ دێننە نێو هەرێمی كوردستان و داهاتی ئەو وڵاتەش دەبەن، حكوومەت بەردەوام داوا دەكات واز لەم كارانە بێنن و داهاتەكە بۆ خەزێنەی گشتی بگەڕێننەوە، ئایا ئەوان گوێ لەم داواكارییانە دەگرن تا لە تەقەكردن و كوشتنی خەڵك گوێ بگرن؟“.
عەلی عەونی جەختی كردەوە كە ئەو دۆخەی لە سلێمانی روودەدات، شەڕی لاهوور جەنگییە لەگەڵ بەرپرسانی دیكەی نزیك و دەڤەرەكەی خۆی و پەیوەندییان بە حكوومەتی هەرێمی كوردستانەوە نییە، ”ئەم ئاگرەی بەریانداوەتە سلێمانی، بۆ ئەوەیەتی خۆی دەسەڵاتی ئەوەل و ئەخیر لە دەڤەری سلێمانی بگرێتە دەست“.
جەختیشی لەوە كردەوە كە سەردانیكردنی ماڵی دوو شەهیدی ڕووداوەكان، ”تەنیا بۆ موزایەدە و پاككردنەوەی پەرێزی خۆیەتی لەو تاوانانەی لەم دواییانەدا كران، بەڵام ئەمە پەرێزیان پاك ناكاتەوە، چونكە هیچ كەسێك لە سلێمانی ناتوانێت بجووڵێت و تەقە لە خەڵكی بكات بەبێ لاهوور جەنگی، ته‌نانه‌ت هاتنى په‌كه‌كه‌ش بۆ نێو فه‌وزاكه، له‌سه‌ر ویست و داواى لاهوور جەنگی بووه و ئەویش لەسەر داوای خەڵكیتر ئەم كارەی كردووە“.
