چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەندامێكی فراكسیۆنی پارتی وەڵامی پەرلەمانتارێكی یەكگرتووی لە پەرلەمانی عێراق دەداتەوە و ئاشكرای دەكات كە ئەوان دەیانەوێت لە پێناو پارە كەرامەتی خەڵكیش بە بەغدا بفرۆشرێت.
ئیدریس ئیسماعیل، ئەندامی فراكسیۆنی پارتی لە پەرلەمانی كوردستان راگەیاند: موسەنا ئەمین ڕووی قسەكانی بكاتە حكوومەتی فیدڕاڵی و لایەنە عێراقییەكان لێیان بپرسێت ئاخۆ بۆچی حكوومەتی فیدڕاڵی ئامادە نییە یاسای پڕكردنەوەی كورتهێنانی دارایی جێبەجێ بكات.
باسیشی لەوە كرد،موسەنا ئەمین و هاوئاوازەكانی لەمە زیاتر چیان دەوێت؟ مەگەر بیانەوێت هەرێمی كوردستان شەرەف و كەرامەتی خەڵكی كوردستانیش بدەنە دەست بەغدا تەنیا لە پێناو پارە.
جەختیشی كردەوە، ئەوانەی خزمەتی ئەجێندا و ڕێكخراوی توندڕەوی دیكەی دونیا دەكەن، زۆر بە لایانەوە ئاساییە لە پێناو پارە كەرامەتی خەڵكەكەیان بفرۆشن، بەڵام ”بەڕاستی عەیبە پەرلەمانتار ئەوەندە كورتبین بێت و پێیوابێت كە ئەگەر هەرێمی كوردستان ئەوەش بكات و سازشیش لەسەر مافە دەستوورییەكانی بكات، بەغدا بێتە پێشەوە و مافەكانی خەڵكی بدات، چونكە هەموان دەزانین بەغدا مووچە وەكوو كارتێكی سیاسی لە دژی هەرێمی كوردستان بەكار دەهێنێت.
گوتیشی: ”موسەنا ئەمین و هاوڕێكانی بۆچی نەیانتوانی بودجەی كوردستان لە بەغدا مسۆگەر بكەن؟ بۆچی پاش ئەو هەموو موجامەلەكردن و هەڵسوورانەیان بە دڵی عەرەبە شیعەكان، لە ڕۆژی تێپەڕاندنی یاسای كورتهێنانی بودجە، هیچ حیسابێكیان بۆ نەكرا.
