چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
له سلێمانی مه‌شرووبخۆر له چه‌ند شوێن و ناوچه‌و قه‌راخ شه‌قامێك ده‌بنه هۆی درووستكردنی بێزاری هاووڵاتییان، پۆلیسی سلێمانیش ئاماژه به‌وه ده‌كات كه شه‌وانه له‌و شوێنانه شه‌ڕ درووست ده‌بێت و خه‌ڵك بێزار ده‌كرێت.
له چه‌ند ناوچه و قه‌راخ شه‌قامێكی سلێمانی، شه‌وانه خه‌ڵكێكی زۆر سه‌رگه‌رمی خواردنه‌وه‌ی مه‌شرووب و نێرگه‌له كێشانن، ئه‌مه‌ش نیگه‌رانی هاووڵاتییانی لێ كه‌وتووه‌ته‌وه، به‌و پێیه‌ی به‌شێك له‌و شوێنانه گشتیین و ئه‌و كه‌سانه‌یش شه‌ڕ و پشێویان درووست كردووه.
ئه‌و حاڵه‌ته پێوه‌ندیدار نییه به كه‌رتی گه‌شتیارییه‌وه
ئه‌و شوێنانه بریتیین له قه‌راخ شه‌قامه سه‌ره‌كییه‌كانی سه‌رچنار و نزیك شوێنه گه‌شتیارییه‌كان و به‌رانبه‌ر به‌نزینخانه‌ی قه‌یوان و نزیك گۆڕستانه‌كه‌ی به‌كره‌جۆی تازه، ناو سنه‌وبه‌ره‌كانی گه‌ڕه‌كی ڕاپه‌ڕین، خوار ده‌باشان و چه‌ند شوێنێكی.
لای خۆیه‌وه ئارام شوانی، به‌ڕێوه‌به‌ری ڕاگه‌یاندنی گه‌شتوگوزاری سلێمانی،ڕاگه‌یاند، ئه‌و دیارده‌یه زۆر ناشرینه، چونكه زۆربه‌ی ئه‌وناوچانه گشتین و پێویسته پۆلیس و ئاسایش لێكۆڵینه‌وه‌ی له‌سه‌ر بكات.
روونیشی كرده‌وه كه ئه‌و حاڵه‌ته پێوه‌ندیدار نییه به كه‌رتی گه‌شتیارییه‌وه، چونكه “ئێمه فه‌رمانگه‌یه‌كی خزمه‌تگوزارین، ئه‌وه‌نده‌یش ئاگادارین پۆلیس ساڵانه یه‌ك دووجار هه‌ڵمه‌تی بۆ چۆڵكردنیان كردووه”.
