چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
وەزارەتی دارایی و ئابووریی هەرێمی کوردستان رایدەگەیێنێت، لە چوارچێوەی یاسای چاکسازی لە مووچە و دەرماڵە و بەخشین و ئیمتیازاتەکان و خانەنشینی لە هەرێمی کوردستان هیچ خزمەتێک بۆ هیچ کەسێک هەژمار ناکرێت ئەگەر بەپێی یاسا نەکرابێت و هەر پلەیەک بەدەر لە یاسا درابێتە مووچەخۆر هەڵدەوەشێنرێتەوە.
بەپێی نووسراوێکی وەزارەتی دارایی و ئابووریی هەرێمی کوردستان کە ئەمڕۆ دووشەممە 29-6-2020 دەرچووە و ئاراستەی “هەموو وەزارەتەکان و فەرمانگەکانی نەبەستراو بە وەزارەت” کراوە، تێیدا هاتووە، هەموو دامەزراوەکانی هەرێمی کوردستان پێداچوونەوە بەمەبەستی رێکخستنی پلە، ناونیشان و مووچەی سەرجەم مووچەخۆرانیان دەکەن. لە نووسراوەکەی وەزارەتی دارایی و ئابووریدا هاتووە، هەر رێکخستنەوەیەک ئەنجامدەدرێت “پێویستە لەچوارچێوەی وەزیفی گشتیدا بێت و لەسەر بنەمای بڕوانامە، خزمەتی راستەقینە و ئەو خزمەتانە بێت کە بەپێی یاسا بەرکارەکان هەژمار کراون”.
