چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەبو ئالا وەلائی ئەمڕۆ دوشەممە لە بەیاننامەیەکدا ئاماژەی بەوەکردوە کە هێزەکانی “بەرەی مقاوەمە” لە کاتی گفتوگۆکانی ڕێکخستنی چەک و چەسپاندنی سەروەریی نیشتمانی، هیچ داواکارییەکی تایبەت یان سیاسییان پێشکەش نەکردوە. وەلائی ڕایگەیاندوە کە لەم وێستگە گرنگەدا، هیچ بەرژەوەندییەک پێش بەرژەوەندیی گشتی عێراق نەخراوە و تەنیا مەبەستیان پاراستنی وڵات بوە.
باسی لەوەشکردوە، خەمی سەرەکی هێزەکانی مقاوەمە، پاراستنی سەربەخۆیی و ڕەتکردنەوەی هەر جۆرە ڕاسپاردەیی و دەستێوەردانێکی دەرەکییە لە بڕیارە نیشتمانییەکانی عێراقدا. ناوبراو ئاماژەی بەوەکرد کە ئەم پرەنسیپانە شایەنی قوربانیدانن و پێش هەمو ئیعتیبارێک دەکەون، چونکە ئامانجی کۆتایی ئەوەیە کە عێراق ببێتە خاوەنی ڕاستەقینەی بڕیارەکانی خۆی و چیتر پاشکۆ نەبێت.
ئەبو ئالا وەلائی لە ڕاگەیەندراوەکەیدا وتی، “مافی شەهیدانی مقاوەمە و جەنگاوەرانە کە شانازی بکەن، چونکە هەڵوێستەکان لە کاتی وێستگە گەورەکاندا تاقی دەکرێنەوە و ئێمەش لە پێناو سەروەریی عێراقدا هەمو داواکارییەکی سیاسی و کەسیمان وەلا ناوە”.
