چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مەسرور بارزانی لە وتەیەکدا، پیرۆزبایی جەژنی رەمەزان و نەورۆزی لە سەرۆک بارزانی و خەڵکی کوردستان کرد.
ئێوارەی ئەمڕۆ هەینی 20ـی 3ـی 2026، بە ئامادەبوونی سەرۆک مەسعود بارزانی و مەسرور بارزانی، سەرۆکی حکوومەتی هەرێمی کوردستان، رێوڕەسمی هەڵکردنی ئاگری جەژنی نەورۆز لەسەر قەڵای هەولێر بەڕێوە چوو.
سەرۆکی حکوومەت لە وتەیەکدا، پیرۆزبایی جەژنی رەمەزان و نەورۆزی لە سەرۆک بارزانی و خەڵکی کوردستان کرد و گوتی: “جەژنی رەمەزان و نەورۆز لە ڕابەر و سەرکردەی گەورەمان جەنابی سەرۆک بارزانی و پێشمەرگە و بنەماڵەی سەربەرزی شەهیدان و هەموو خەڵکی کوردستان دەکەین و جەژنتان پیرۆز بێت.”
مەسرور بارزانی لە درێژەی گوتەکەیدا، ئاماژەی بەوە دا کە “خەڵکی کوردستان بە درێژایی مێژوو بەرانبەر بە زاڵم و ستەمکار وەستاون و هیچ کاتێک خۆیان نەچەماندووە و ئێستاش ئومێدمان وایە لە ژێر سێبەر بە ڕابەرایەتی سەرۆک بارزانی، گەلی سەربەرزی کوردستان، هەر سەردەکەوێت و بەرانبەر بە هەموو ستەمکارێک دەوەستێت.”
سەرۆکی حکومەت گوتیشی: “ئومێد دەکەین ئاسۆی گەلەکەمان لە ژێر سەرکردایەتیی سەرۆک بارزانی و بە هێز و بازووی پێشمەرگە قارەمانەکان و خۆڕاگری گەلەکەمان پڕشنگدارتر و رووناکتر بێت.”
لە کۆتاییدا سەرۆکی حکەومەت، سوپاسی خۆڕاگری خەڵکی کوردستانی کرد و گوتی “زۆر زۆر سوپاسی خۆڕاگری خەڵکی کوردستان دەکەین بە تایبەت لەم کاتەدا کە دەبینین شەڕ و ئاژاوە لە ناوچەکەماندا هەیە، ئێمە بە هەموو توانایەکمانەوە هەوڵ دەدەین بۆ ئەوەی کوردستان لە هەموو شەڕ و ئاژاوەیەک بپارێزین و بەدوور بگرین، دڵنیاشم بە پشتیوانیی خوای گەورە بەرەو ئاسۆیەکی ڕووناکتر هەنگاو دەنێین.”
