چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
کرمانج حسین مصطفی
ئەندامێکی لێژنەی ئاسایش و بەرگری لە پەرلەمانی عێراق ڕایدەگەنێت:، پارێزگاری سەپێندراوی سەر کەرکووک، بەشێکە لە کێشەکانی ئەو پارێزگایە.
ناسر ھەرکی، ئەندامی فراکسیۆنی پارتی و ئەندامی لێژنەی ئاسایش و بەرگری لە پەرلەمانی عێراق، ڕاگەیاند، وەک لێژنەی ئاسایش و بەرگری سەردانی فەرماندەیی ئۆپەراسیۆنەکانی کەرکووکیان کردووە و پێیان راگەیاندوون، راکان جبوریی پارێزگاری سەپێندراوی سەر کەرکووک بەشێکە لە کێشەکانی ئەو شارە.
ناسر هەرکی هەروەها رایگەیاند، بە فەرماندەیی ئۆپەراسیۆنەکانی کەرکووکیان راگەیاندووە، راکان جبوری هەوڵ دەدات کێشەی زۆر نێوان کورد و عەرەب لە کەرکووک دروست بکات و سەقامگیریی کۆمەڵایەتی لە شارەکە، تێک دەدات.
هەروەک ئەو پەرلەمانتارە رایگەیاند، فەرماندەیی ئۆپەراسیۆنی کەرکووک بەڵێنی داوە پارێزگاریی لە ئاسایشی هاووڵاتییانی کەرکووک بکات و دوور بکەوێتەوە لە کێشە سیاسییەکان و تێکەڵی نەبێت.
ناسر هەرکی جەختی لەوە کردەوە، کە جگە لە کورد، پارێزگاری سەپێندراوی سەر کەرکووک دژایەتیی پێکهاتەکانی دیکەش دەکات و تەنیا کەسوکاری خۆی لە پۆستەکان دادەنێت، کە زۆربەی کەسوکارەکەی ئەندام و چەکداری رێکخراوی تیرۆریستی داعش بوون.
هەرکی بە پێویستی دەزانێ کار بۆ ئاساییکردنەوەی رەوشی کەرکووک و لابردنی هەموو دەرەنجامەکانی خیانەتی 16ـی ئۆکتۆبەری 2017 بکرێت.
دوای خیانەتی 16ـی ئۆکتۆبەر، میلیشیاکانی حەشدی شەعبی کەرکووک و هەموو ناوچە کوردستانییەکانی دیکەی ئەو سنوورەیان داگیر کرد و راکان جبورییان وەک پارێزگاری کەرکووک بە وەکالەت، بەسەر کەرکووکییەکاندا سەپاند.
