چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
خه‌ڵكی كوردستان ساڵانە به‌په‌رۆشه‌وه یادی ریفراندۆم ده‌كه‌نه‌وه، چونكه پێیان وایه هێشتا ئه‌و عه‌قڵیه‌ته نه‌گۆڕاوه، كه له‌عێراقه‌وه به پله دوو سه‌یرمان دەكەن.
به‌ڵێن عه‌بدوڵا، سكرتێری گشتیی حزبی زه‌حمه‌تكێشانی كوردستان، رایگەیاند: “یادی ریفراندۆم لای هه‌مووان پیرۆزه و چه‌ند ساڵێك به‌سه‌ر ئه‌و یاده‌دا تێپه‌ڕیوه، كە خه‌ڵكی كوردستان به (به‌ڵێ) ده‌نگیان دا بۆ سه‌ربه‌خۆیی كوردستان، گه‌لی كوردستان داوای مافی خۆی كرد و مافه‌كانی خۆی ویست، تێناگه‌م بۆ گه‌لێك داوای مافی خۆی بكات شیاوی ئه‌وه بێ ئه‌و هه‌موو دژایه‌تی و گه‌مارۆ‌یه‌ی بخرێته سه‌ر؟.
ڕوونیشی كردەوە ریفراندۆم بۆیه كرا، چونكه له‌دوای 2003 به ئێستاشه‌وه هه‌میشه عه‌قڵیه‌تێك له به‌غداوه هه‌یه نایه‌وێت كورد هیچ مافێكی هه‌بێت، ”به‌داخه‌وه ئه‌و ده‌ستووره‌ی كه خه‌ڵكی عێراق و خەڵكی كوردستان ده‌نگی بۆ دا، ئه‌وان وه‌لا‌یان ناوه و نایانه‌وێت جێبه‌جێی بكه‌ن.
سكرتێری گشتیی حزبی زه‌حمه‌تكێشانی كوردستان گوتیشی: ”تا ئێستا ریفراندۆم راسته، چونكه عێراق باوه‌ڕی به ده‌ستوور و بە هاووڵاتیبوونی كورد وەك هاووڵاتیی پله یه‌كی عێراق نییە، بۆیه له‌م یاده‌دا جه‌خت ده‌كه‌ینه‌وه، كه ریفراندۆم راسته، به درێژایی مێژوو كورد زوڵمی لێ کراوە، مێژووی گه‌لی كوردستان خه‌بات و قوربانیدانی گه‌لی كوردستان بۆ ئه‌وه بووە بگه‌ینه سه‌ربه‌خۆیی.
