چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
نەجیبە ئیبراهیم، شارەزایی دەستووری ڕایگەیاند”بڕیارەكەی دادگەی فیدراڵی سیاسییە و بە بێ دیراسەكردن دەركراوە، تەنانەت خۆپێشاندانی كۆمەڵێك عەرەب لەبەردەم بارەگەی پارتی لە كەركووك ئەویش سیاسییە، كە چەندان رۆژە رێگەیان گرتووە و رێگرن لە هاووڵاتییان لە پەیداكردنی قووتی منداڵەكانیان، گەچی كەس بەلایاندا نەدەڕۆیشت، بەڵام گەنجی كورد بۆ مافی نەتەوەكەی دەڕواتە سەر شەقام، چوار كەس شەهید و دەیانی تریش بریندار دەكرێن.
زیاتر گوتی، ئەوانە بیانەوێ بە یاسایی رێگری بكەن، دەڕۆن بڕیاری دادگەی فیدراڵی دێنن كە لە بەرژەوەندی ئەوان دەری دەكات، لەكاتێكدا بڕیارەكە سیاسییە و هیچ مۆركێكی یاسایی و دەستووری پێوە نییە، وەك دادگەی سەردەمی ئەنجوومەنی شۆڕشی سەدام حوسێنی لێ هاتووە ، بۆیە هەموو بڕیارەكانی دادگەی فیدراڵی عێراق دژی كورد دەردەكرێت.
“كاتێك دەگوترێت لە عێراق سیستمی دیموكراتی و فرەحزبی و ئاینی هەیە كە دادگەی فیدراڵی بە بێلایەن كار بكات، بۆیە نابێت بڕیارێكی وا دژ بە حزبێكی گەورەی وەك پارتی دەربكات، لە كەركووك كە زۆرینەی كوردە و زۆرینەیان جەماوەری پارتین، بارەگەكانی ئەو حزبە بارەگەی سیاسی و جەماوەرین”، نەجیبە ئیبراهیم وای گوت.
