ڕاگەیەنراوی حکوومەتی هەرێمی کوردستان لەسەر هێرشەکەی ئەمڕۆی تیرۆریستانی داعش لە کەرکووک

حکوومەتی هەرێمی کوردستان ڕاگەیەنراوێکی لەسەر هێرشەکەی ئەمڕۆ یەکشەممەی تیرۆریستانی داعش بۆ سەر کەرکووک بڵاو کردەوە و جەخت لە گرنگیی هەماهەنگی زیاتری نێوان هێزی پێشمەرگە و سوپای عێراق دەکاتەوە.

د. جوتیار عادل گوتەبێژی حکوومەتی هەرێمی کوردستان ڕایگەیاند: بەداخەوە ئەمڕۆ بەهۆی هێرشێکی تیرۆریستانی داعشەوە لە باشووری ڕۆژئاوای کەرکووک، ئەفسەرێک و چەندین کارمەندی پۆلیس شەهید بوون و چەند پۆلیسێکی دیکەش بریندار بوون.

ڕاشیگەیاند: بەناوی حکوومەتی هەرێمی کوردستانەوە پرسە و سەرەخۆشی خۆمان ئاراستەی بنەماڵە و کەسوکاری قوربانییەکان دەکەین و خۆمان بە هاوخەمیان دەزانین، لە خوای گەورە داواکارین شەهیدەکان بە بەهەشتی بەرین شاد بکات و شیفای بریندارەکانیش بدات.

گوتەبێژی حکوومەت لە ڕاگەیەنراوەکە هەروەها ئاماژەی بەوە داوە کە “لێرەوە بۆ جارێکی دیکە جەخت لە گرنگیی هاریکاری و هاوئاهەنگیی زیاتری نێوان هێزی پێشمەرگە و سوپای عێراق بۆ ڕووبەڕووبوونەوەی هەڕەشەی تیرۆریستانی داعش دەکەینەوە، بەتایبەتی لە ناوچە کوردستانییەکانی دەرەوەی ئیدارەی هەرێم.”