چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆک بارزانی لە پەیامەکەدا، دەڵێت: لەو یادە دڵتەزێنەدا رایدەگەیێنین كە گەلەكەمان هەرگیز زمانی زۆرداری و تاوان قبووڵ ناكات و دەبێ دەوڵەتی عێراقیش قەرەبووی هەموو ئەو تاوان و ستەمەكارییانە بدات كە لەدژی میللەتەكەمان ئەنجام دراوە.
پەیامی سەرۆك بارزانی لە یادی سی و چوار ساڵەی ئەنفالی بادینان
بەناوی خودای مەزن و دلۆڤان
لە 25ـی ئابی 1988 هەتا شەشی ئەیلوولی 1988 لە درێژەی زنجیرە تاوانەكانی رژێمی عێراق لە دژی خەڵكی كوردستان، بەشێكی زۆری ناوچە و گوندەكانی دەڤەری بادینان كەوتنە بەر هەڵمەتی نامرۆڤانەی كیمیابارانكردن و گرتن و كوشتن و راگواستن و ئەنفالی هاووڵاتیانی بێتاوان لە لایەن هێزەكانی رژێمی ئەو كاتی عێراق. لە ئەنجامی ئەو تاوانە نامرۆڤانەیە بە هەزاران هاووڵاتیی كوردستان شەهید و بێسەروشوێن و ئاوارە كران و سەدان گوندیش خاپوور بوون.
مەبەستی رژێم لەو رەفتارە شۆڤینی و ئەو تاوانە گەورەیە گۆڕینی دیموگرافی كوردستان و شكاندنی ئیرادەی گەلی كوردستان لەرێگەی چەك و زەبروزەنگ و ستەمكاری بوو، بەڵام ئیرادەی گەلی كوردستان بۆ مانەوە و ئازادیخوازی سەركەوت و ئەوە دوژمنان و نەیاران و تاوانباران بوون كە كەوتنە زبڵدانی مێژوو.
لە یادی سی و چوار ساڵەی تاوانی ئەنفالی بادینان سڵاو بۆ گیانی پاكی شەهیدانی کۆمەڵکوژیی کوردانی فەیلی و ئەنفالی بادینان و گەرمیان و بارزان و هەموو شەهیدانی رێگەی ئازادیی كوردستان دەنێرین. لەو یادە دڵتەزێنەدا رایدەگەیێنین كە گەلەكەمان هەرگیز زمانی زۆرداری و تاوان قبووڵ ناكات و دەبێ دەوڵەتی عێراقیش قەرەبووی هەموو ئەو تاوان و ستەمەكارییانە بدات كە لەدژی میللەتەكەمان ئەنجام دراوە.
مسعود بارزانی
25ی ئابی 2022
