چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سکرتێری حزبی دیموکراتی بەیت نەھرێن گوتی، زیادبوونی کورسیی کۆتا دەبێتە ھۆی ئەوەی کە بۆ لێک تێگەیشتنی زیاتری فراکسیۆنەکان باڵانسێک ھەبێت.
ڕۆمیۆ ھەکاری، ڕایگەیاندووە: ”ئێمە وەکوو حزبی دیموکراتی بەیت نەھرێن ھەر لە سەرەتاوە لەگەڵ ئەوە بووین کە کورسییەکانی کۆتا لە ھەموو ڕوویەکەوە پارێزراو بن و داوایشمان کردووە کورسییەکان زیاد بکرێن، چونکە زیادبوونی کورسییەکانی کۆتا دەبێتە هۆی ڕێکخستنی زیاتری پەرلەمان و باڵانسێک.
دەڵێ:”تێگەیشتنێک لە نێوان فراکسیۆنەکان ھەبێت، بۆیە ھەندێک لایەن باس لەوە دەکەن کە کورسیی کۆتا کەم بکرێتەوە، وا دەزانن ھۆکاریی کێشە و گرفتەکانی ھەرێمی کوردستان کۆتایە، کە کۆتاکان ھەمیشە پاڵنەرێکی پۆزەتیڤ بوون و ئەگەر گرفتێک ھەبێت لە گۆڕەپانی سیاسیی ھەرێمی کوردستان عاملێکی خێر بن بۆ لێک تێگەیشتنی نێوان لایەنەکان و پاراستنی تەبایی و یەکڕیزیی.
سکرتێری حزبی دیموکراتی بەیت نەھرێن ڕوونیشی کردەوە: ”پێمان وایە وەکوو حزبەکەی خۆمان، مافی ئێمە یەک پاکێجە، نەک تەنیا باسی یەک پرس بکرێت و پێویستە باسی ھەموو شتێک بکرێت و ڕێککەوتنێکی بنەڕەتی لەنێوان لایەنەکانی کلد و ئاشووری بە کورسیی کۆتاشەوە ھەبێت، ئەوکات دەتوانین باشتر بەرگری لە کورسییەکانمان بکەین و بیانپارێزین و زیاد بکەین.
