چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
جێگری سوپاسالار لە وەزارەتی پێشمەرگە، باسی وردەکاریی ھێرشەکەی داعش لە سنووری کوڵەجۆ بۆ سەر ھێزی پێشمەرگە دەکات و دەڵێت، بە ھۆی بۆشایی ئەمنی لە ناوچە کوردستانییەکان، داعش بەردەوام مەترسییەکانی لە زیادبووندایە، بۆیە ئەمە بە ئۆپەراسیۆن چارەسەر نابێت و پێویستی بە ھێزی ھاوبەش ھەیە.
لیوا قارەمان کەمال، ڕایگەیاند، بەداخەوە شەوی ڕابردوو داعش لە سنووری لیوای پێنجی سەر بە وەزارەتی پێشمەرگە، تەقەیان لە رەبایەکی ھێزی پێشمەرگە کردووە و چەند پێشمەرگەیەک بریندار بوون، ھەمەرێکی پێشمەرگەش کە بە ھانای ئەو پێشمەرگانەوە رۆیشتوون کە بریندار بوون، لە رێگادا بۆمبێکیان پێدا تەقیوەتەوە، کە بەو ھۆیەوە پێنج پێشمەرگە شەھید بوونە و چوار پێشمەرگەش پێشتر بریندار ببوون.
ناوبراو باسی لەوەش کرد، داعش لە دوورەوە بە چەکی قەنناس و حەراری تەقەی لە پاسەوانەکانی پێشمەرگە کردووە و سەرەتا پێشمەرگەیەکی بریندار کردووە و دواتر پێشمەرگەی دیکە تەقیان لێکراوە و چوار پێشمەرگە بریندار بوونە، کە بەداخەوە دواتر بۆمبیان بە ھەمەرێکی پێشمەرگەدا تەقاندووەتەوە و پێنج پێشمەرگە شەھید بوونە.
جێگری سوپاسالار دەشڵێ، ھۆکاری ئەو پەلامارانەی داعش بۆ ئەوە دەگەڕێتەوە کە بۆشاییەکی ئەمنی لە ناوچەکە ھەیە و پێویستە بە ھەماھەنگی لە نێوان پێشمەرگە و سوپای عێراق پڕ بکرێتەوە، چونکە داعش لەو ناوچانە ھەیە و خۆیان لە ئەشکەوت و شوێنی دیکە حەشار داوە و ھێرشی سەر پێشمەرگە و سوپای عێراق و خەڵکی سڤیلیش دەکەن، بۆیە تا ئەو بۆشاییە ئەمنیانە ھەبن، مەترسییەکانی داعش زیاتر دەبن.
لیوا قارەمان ڕوونیشی کردەوە، مەترسیی داعش بە ئۆپەراسیۆن چارەسەر نابێت و کاتێک ئەنجام دەدرێت، دەکشێنەوە و کە ئۆپەراسیۆنیش تەواو بوو، دەگەڕێنەوە شوێنی خۆیان، بۆیە پێویستە بۆشاییەکە بە هێز پڕ بکرێتەوە، چونکە بەو شێوەیە داعش زیاتر دەبێتە مەترسی و کەم نابێتەوە.
