چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
شارەزایەكی ئابووری، ئەو ڕێگایانە ئاشكرا دەكات كە لاوان دەتوانن لە ڕێگەیەوە ببن بە خاوەنی كاری خۆیان و دەڵێت، گرنگە لاوان بیر لەو پڕۆژانە بكەنەوە كە لەگەڵ واقیعی ئابووری و باری دارایی هاووڵاتیان گونجاون
د. شڤان جەمال، مامۆستای كۆلێژی كارگێڕی و ئابووریی زانكۆی سلێمانی، ڕاگەیاند: “ڕەنگە لە ئێستادا ئەو دۆخەی هەرێمی پێدا تێپەڕ دەبێ، لە ڕووی ئابووری و دارایی و ئەو ناسەقامگیرییەی كە هەیە، هەبوونی دەرفەتی كار و پڕۆژە ئاسان نەبێ، بەڵام لەگەڵ ئەوەشدا ئەستەم نییە و لاوان دەتوانن جێگەی خۆیان لە بازاڕی كاردا بكەنەوە.
ئەو مامۆستایەی زانكۆ گوتیشی: “لە سەرەتاوە گرنگ و پێویستە گەنجان و لاوان بزنس پلانیان هەبێ، واتا دانانی پلان و نەخشەڕێگایەك بۆ ئەو پڕۆژەیەی كە دەیانەوێت جێبەجێی بكەن، ئەمەش بە كۆكردنەوەی زانیاری و داتای تەواو سەبارەت بەو بزنسە و ئەو ژینگەیەی دەیانەوێ پڕۆژەكەی تێدا ئەنجام بدەن.
ئەو شارەزایەی بواری ئابووری زیاتر گوتی: “لە قۆناغی یەكەمدا خاوەن پڕۆژە پێویستی بە هاوكاری هەیە، بۆیە گرنگە حكوومەت هاوكاری و پشتیوانیی ئەو كەسانە بكات كە خاوەن بیرۆكە و پڕۆژەن لە ڕێگەی پێدانی قەرزی بچووك.
