چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
فەرماندەی ھێزەکانی پێشمەرگە لە شنگال رایگەیاند، پەکەکە تاوەکو ئێستا لە شنگال ماون و زیاد بوونە و کەمیان نەکردووە، حکوومەتی عێراقیش ھۆکارە بۆ دەرنەچوونیان، چونکە لە لایەک مووچە دەداتە پەکەکە و لە لایەکیش داوای دەرکردنیان دەکات.
قاسم شەشۆ، ڕایگهیاند: تاوەکو ئێستا دۆخی شنگال ھەر بە خراپی ماوەتەوە و خراپتریش دەبێت، بە ھۆی خراپیی دۆخەکەشەوە خەڵک ناتوانێت بگەڕێتەوە، چونکە پەکەکە ئامادە نییە بۆ بەرژەوەندیی خۆیان شنگال چۆڵ بکەن و داگیریان کردووە، حکوومەتی عێراقیش جیددی نییە لە دەرکردنیان و بگرە ھاوکارییان دەکات، بۆیە ھۆکاری دەرنەکردنیان، حکوومەتی عێراق خۆیەتی.
شەشۆ گوتیشی، حکوومەتی عێراق لە لایەک مووچە بە چەکدارانی پەکەکە دەدات و لە لایەکیش داوای دەرکردنیان دەکات، بەڵام ڕاست ناکەن، چونکە گەر بیانەوێت بە ئاسانی دەتوانن دەریان بکەن، بێگومان پەکەکەش بە ھەڕەشە نەبێت دەرناچن و ئەوانیش تەنھا بە قسە داوای دەرکردنیان دەکەن.
ئەو فەرماندەیە دەشڵێ، تا ئێستا بەغدا مانگانە مووچەی زیاتر لە ھەزار چەکداری پەکەکە دەدات، کە بۆ ھەر چەکدارێک نیو ملیۆن دینارە و زۆرینەی ئەوانەش خەڵکی شنگال نین کە مووچەکە وەردەگرن، ئەوانیش ئەو پارەیەی وەریدەگرن، بەسەر خۆیانیدا دابەشی دەکەن.
