چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
هێرشکردن بۆ سەر دادگاکان و دژایەتیکردنی یاسا و دادگا شەرعیەتدانە بەو تاوان و کوشتن و تیرۆرانەی کراون لە سەرووی هەمووشیانەوە خیانەتە گەورەکەی 16ی ئۆکتۆبەر.
مەهدی کاکەیی، ئەندامی سەرکردایەتی پارتی دیموکراتی کوردستان لە کەرکوک/ گەرمیان راگەیاند، هەرێمی کوردستان لەسایەی دەزگا شەرعییەکان بوونی هەیە و ئەو قەوارەی کە پارێزراوە لە هەموو ناوچەکە و دنیا بەهۆی ئەو دەزگا شەرعیانەوەیە، دەستبردن بۆ دەزگا شەرعییەکانی کوردستان دەستبردنە بۆ هەموو کوردستان و سەروەری خوێنی شەهیدان.
وەک زیاتر خستیەڕوو دەستبردن و دژایەتیکردنی دادگاکان بۆ ئەوەیە بەشێک لە هاووڵاتییان متمانەیان بە دادگا و یاسا نەمێنێت، هەر ئەوانەی دژایەتی یاسا دەکەن خۆیان بۆ هەندێ کەیس و بابەت پەنا بۆ دادگا دەبەن لە پێناو بەرژەوەندی خۆیان، ئەمەش درێژەدانە بە کارە خراپەکانی خۆیان و شاردنەوەیان لە پاڵ ئەو دژایەتییە.
ئەو ئەندامەی سەرکردایەتی پارتی پێی وایە، دژایەتیکردنی دادگاکان بۆ شەرعیەتدانە بە تاوان و کوشتن و دزی و گەندەڵی و لە سەرووی هەمووشیانەوە ئەو خیانەتە گەورەی کە لە کەرکوک و کەرکوکییەکان کرا لە 16ی ئۆکتۆبەر.
