چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئێوارەی ئەمڕۆ دووشەممە مەسرور بارزانی سەرۆکی حکوومەتی هەرێمی کوردستان پێشوازی لە ئۆله دیل و برونۆ ئوبێرت باڵوێزانی ئەڵمانیا و فەرەنسا لە عێراق کرد.
لە دیدارەکەدا پەرەپێدانی زیاتری پەیوەندییەکانی نێوان هەرێمی کوردستان و ئەڵمانیا و فەرەنسا تاوتوێ کرا.
باڵوێزانی ئەڵمانیا و فەرەنسا لە عێراق، ئامادەیی وڵاتەکانیان دەربڕی بۆ بەهێزکردنی هاوکاری و هەماهەنگی لەگەڵ هەرێمی کوردستان و ئاماژەیان بەوەدا کە دەرفەتێکی باش هەیە بۆ پەرەپێدانی زیاتری پەیوەندییەکانیان لەگەڵ حکوومەتی هەرێمی کوردستان.
سەرۆکی حکوومەت وێڕای سوپاسکردنی هەردوو وڵات بۆ هاوکاریکردنی هەرێمی کوردستان، بەتایبەتی لە ڕووبەڕووبوونەوەی تیرۆردا، تیشکی خستە سەر گفتوگۆکانی نێوان هەرێم و حکوومەتی فیدراڵی و جەختی لەوە کردەوە کە چارەسەرکردنی کێشەکانی نێوان هەردوولا و گەیشتن بە ڕێککەوتن لەسەر بنەمای دەستوور، لە بەرژەوەندیی گشت هاووڵاتییانی عێراقدایە.
گرنگیی جێبەجێکردنی ڕێککەوتننامەی شنگال و گەڕانەوەی ئارامی و سەقامگیریی بۆ دەڤەرەکە، تەوەرێکی دیکەی گفتوگۆکان بوو.
