چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لیژنەی باڵای بایۆمەتری رایدەگەیەنێت، زیاتر لە 16 ھەزار كەس لە مووچەیەك زیاتر بە نایاسایی وەردەگرن، و بڕیاری راگرتنی مووچەكانیان دەدات.
ئەمڕۆ سێشەممە ٣ی١١ی٢٠٢٠، لیژنەی باڵای جێبەجێکردنی قۆناغی دووەمی بایۆمەتری بەسەرپەرشتی قوباد تاڵەبانی جێگری سەرۆكی ئەنجوومەنی وەزیران و ئامادەبوونی وەزیری دارایی و ئابووری، كۆبوونەوەی ژمارە دووی ئەنجامدا.
لە کۆبوونەوەکەدا، فەرمانگەی هەماهەنگی و بەدواداچوون و فەرمانگەی تەکنەلۆجیای زانیاری، پشتبەست بەئامار و داتاکانی بایۆمەتری، راپۆرتێکیان لەبارەی فرەمووچەیی پێشکەش کرد، بەپێی ئەو راپۆرتە 106 هەزار و 839 كەس لە یەك مووچە زیاتر وەردەگرن کە زۆربەیان بەپێی یاسا رێکخراون.
پاش بەدواداچوون بۆ دۆسیەی ئەو مووچەخۆرانە، دەركەوت 16 هەزار و 505 کەس، لەیەك مووچە زیاتر بە نایاسایی وەردەگرن، بۆیە لیژنەی باڵا، لەچوارچیوەی یاسای چاکسازیدا، وەزارەتی دارایی و ئابووری راسپارد بۆ راگرتنی مووچەی داهاتوویان لەگەڵ پاراستنی مافی ئەو کەسانە بۆ تانەدان (طعن) لەم بڕیارە، ماوەی مانگێکیش دیاری کرا بۆ سەرلەنوی پێداچوونەوەی دۆسییەکانیان.
