چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
دانیشتوانی گوندەکانی ناوچەی شاڕباژێڕی سەر بە پارێزگای سلێمانی، بەھۆی چاکدارەکانی پارتی كرێكارانی كوردستان (پەکەکە) لە ناوچەکەیاندا، لە دۆخێکی خراپدان و داوا دەکەن چەکدارەکانی پەکەکە لە ناوچەکەیان دوور بکەونەوە.
ئازاد حەمە ڕەشید، دانیشتووی گوندی ماوەتی ناوچەی شارباژێڕ، ڕاگەیاند، چەکدارەکانی (پەکەکە) لە گوندەکانی ناوچەی شارباژێڕ تەراتێن دەکەن و بە ئارەزووی خۆیان تێکەڵی ھاووڵاتییان دەبن، ”ئەمەش ترس و دڵەڕاوکێی بۆ ھاووڵاتیانی ئەو ناوچانە دروست کردووە، چونکە بەردەوام چەکدارەکانی پەکەکە لەلایەن فڕۆکەی بێ فڕۆکەوانی تورکیاوە چاودێری دەکرێن و زۆرجار لە ئەگەری بەئامانج گرتنی چەكدارەكانی پەکەکە، هاووڵاتیانی سڤیل دەبنە قوربانی“.
ڕوونیشی كردەوە: ”کێشەی سەرەکیی دانیشتووانی گوندەکانی شارباژێڕ ئەوەیە، پەکەکە بەردەوام دێنە ناو بازاڕ و خۆیان تێکەڵی ھاووڵاتیان دەکەن، ئەوەش مەترسی بۆ خەڵکی ناوچەکە درووست کردووە، ھەروەھا بەرپرسانی ناوچەکە داوایان لە فەرماندەکانی پەکەکە کردووە، بەشێوەیەکی زەق خۆیان دەرنەخەن و تێکەڵی ھاووڵاتیانی ناوچەکە نەکەن، تاوەكوو ژیانی ھاوڵاتییانی گوندەکانی شارباژێڕ پارێزراو بێت، بەڵام چەکدارانی پەکەکە زیاتر مەفرەزەکانیان لە شاخی ئاسۆس دەھێننە خوارەوە و تێکەڵی ھاووڵاتیان دەبن.
هاووڵاتییەكە ئاشكرای كرد، چەکدارەکانی پەکەکە، سەرجەم كانیاوی ناوچەكەیان قۆرخ کردووە، لە كاتێكدا ناوچەكە خۆی ئاوی کەمە، ھەروەھا ”زۆرجار مەفرەزەکانی پەکەکە، دەچنە ناو ڕەز و باخی ھاووڵاتیان، لەگەڵ ئەوەشدا مەفرەزەکانیان باج و سەرانە لە خەڵكی وەردەگرن“.
