سەرۆکی حکوومەت و پلاسخارت جەخت لە ئەنجامدانی هەڵبژاردنی پەرلەمانی کوردستان لە کاتی خۆی دەکەنەوە

سەرۆکی حکوومەتی هەرێمی کوردستان لەگەڵ نێردەی تایبەتی نەتەوەیەکگرتووەکان لە عێراق کۆبووەوە و جەختیان لە پێویستیی ئەنجامدانی هەڵبژاردنی پەرلەمانی کوردستان لە کاتی دیاریکراوی خۆی دەکەنەوە.

مەسرور بارزانی سەرۆکی حکومەتی هەرێمی کوردستان ئەمڕۆ شەممە 30ـی 09ـی 2023 پێشوازی لە جینین هێنیس- پلاسخارت نوێنەری تایبەتی سکرتێری گشتیی نەتەوەیەکگرتووەکان لە عێراق کرد.

لە کۆبوونەوەکەدا دوایین گۆڕانکاری و پێشهاتەکانی دۆخی گشتیی عێراق و گرنگیی دەستەبەرکردنی مافەدەستووری و شایستە داراییەکانی هەرێمی کوردستان تاوتوێ کران.

لە تەوەرێکی دیکەی کۆبوونەوەکەدا، بیروڕا لەبارەی بارودۆخی هەرێمی کوردستان ئاڵوگۆڕ کرا و جەخت لە پێویستیی ئەنجامدانی هەڵبژاردنی پەرلەمانی کوردستان لە کاتی دیاریکراوی خۆی لە 25ـی 02ـی 2024، کرایەوە.