تیمی وه‌زاری پارتی سەردانی لایەنە سیاسییەکانی هەرێمی کوردستان دەکات

به‌گوێره‌ی زانیارییه‌كانی كوردستان24، شانده‌كه‌ی پارتی له‌ تیمی وه‌زاری ئه‌و حزبه‌ لە حکومەتی هەرێمی کوردستان پێكدێت، بە سەرۆکایەتی پشتیوان سادق و ئەندامییەتی ساسان عەونی، سەفین دزەیی و ئومێد سەباح.

له‌ كۆبوونه‌وه‌كانیاندا له‌گه‌ڵ لایەنە سیاسییەکانی هەرێمی کوردستان دەکات، دۆخی ناوخۆی هەرێمی کوردستان لە رووی سیاسی و دارایی و کار، پرۆژە و هەنگاوەکانی کابینەی نۆیەمی حکومەتی هەرێمی کوردستان، تاوتووێده‌كه‌ن.

وابڕیاره‌ سبەی شەممە (29ی تشرینی یه‌كه‌م/ئۆكتۆبه‌ری 2022)، شانده‌كه‌ی پارتی سه‌ردانی هه‌ریه‌كه‌ له‌ حزبی شیوعی کوردستان حزبی زەحمەتکێشانی کوردستان بكه‌ن.

هه‌روه‌ها رۆژی یەکشەممە (30ی تشرینی یه‌كه‌م/ئۆكتۆبه‌ری 2022)، له‌گه‌ڵ یەکگرتووی ئیسلامی کوردستان كۆببنه‌وه‌ و دواتر سه‌ردانه‌كانی ئه‌و شانده‌ بۆ لای لایه‌نه‌ سیاسییه‌كانی دیكه‌ی هه‌رێمی كوردستان به‌رده‌وام ده‌بێت.