چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لە تەواوی گوند و مەرزە لاوەکییەکانی بازرگانی، چەکدارانی پەکەکە هەن و لەژێر ناوی جۆراوجۆر سەرانە وەردەگرن. هاووڵاتییانیش نیگەرانن و بەهۆی بێدەنگیی لایەنی پێوەندیدارەوە بە ناچاری باج دەدەن.
سەرچاوەیەکی ئاگادار لە قەزای پێنجوێن کە نەیویست ناوی ببرێت،ڕایگەیاند: “لە تەواوی ئەو مەرزە لاوەکییانەی هەیە لە سنووری قەزای پێنجوێن لەگەڵ ڕۆژهەڵاتی کوردستان، چەکدارانی پەکەکە هەن و بە زۆرەملێ سەرانە لە کاسبکاران وەردەگرن.”
ئەو سەرچاوەیە دەڵێت: ” لە گوندەکانی سیاگوێز، وێنە، کانی خان، سەیرانبەن، نزارە، چەمەک و سپیلکێ بنکە و بارەگای پەکەکە هەیە و سەرانەی زۆرەملێ وەردەگرن”.
دەشڵێت، ڕۆژانە چەکدارانی پەکەکە لە وەرگرتنی سەرانە لە هاووڵاتییان و بازرگانان داهاتێکی زۆر کۆ دەکەنەوە، هیچ کەس بۆی نییە لە باج و سەرانە خۆی بدزێتەوە.
سەرچاوە ئاگادارەکە گوتیشی: “هاووڵاتییان و بازرگانان لە ناچاری سەرانە بە چەکدارانی پەکەکە دەدەن، چونکە هەرچەندە داوا لە لایەنە پێوەندیدارەکان کراوە چارەسەریان بۆ بدۆزنەوە و ڕێگە نەدەن پەکەکە باجیان لێ وەربگرێت، بەڵام بە دەمیانەوە نەهاتوون”.
سەرچاوەکە زیاتر زانیاری دا و گوتی: “هاووڵاتیان زۆر بێتاقەت و ناڕازین، بەڵام ئەگەر بێت و سەرانە نەدەنە بەشی وەرگری باجی پەکەکە، ئەوە لە لایەن چەکدارەکانەوە تەقەیان لێ دەکرێت، تەنانەت ئاژەڵدارانی ناوچەکە دەبێت سەرانە بدەن”.
