چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
محەمەد فاتیح، رۆژنامەنووسێکی شاری سلێمانییە و باس لەوە دەکات کە لەلایەن کەسانێک لە شاری سلێمانی هێرشکراوەتە سەر ماڵەکەی و خۆی و هاوسەر و منداڵەکانی تووشی دڵەڕاوکێ بوونە.
ئەو ڕۆژنامەنووسە کە بێژەر و هەواڵسازە لە رادیۆی نەوا لە دیدارێکی رۆژنامەوانیدا رایگەیاندووە: “لەژێر پەردەپۆشكردنی بە كۆمەڵێك منداڵ و هەرزەكار ماوەی نزیكەی دوو مانگ دەستدرێژی كرایە سەر ماڵەكەم لە گەڕەكی كوردساتی شاری سلێمانی و خۆم و هاوسەر و منداڵەكانم تووشی ترس و دڵەڕاوكێ بووین، ئەمەش جێگای قبوڵ نییە”.
محەمەد فاتیح داوا لە دەسەڵاتدارانی هەرێمی كوردستان دەکات “چیدیکە رێگە بە شكۆشكاندن و سووكایەتیپێكردن و دەستدرێژیكردنە سەر رۆژنامەنووسان نەدرێ و لێپێچینەوەش لەگەڵ ئەو كەسانە بكرێت كە لە پشت ئەم كارەوە بوونە، ئەمە کارێکی دژی ئازادی و دیموکراسی و شارستانییەتی هەرێمی کوردستانە”.
لە ماوەی رابردووشدا ئەو رۆژنامەنووسە لە رێگای سەنتەری میترۆ بۆ داكۆكیكردن لە مافی رۆژنامەنووسان و روانگەی عێراقی بۆ ئازادی رۆژنامەوانی رایگەیاندبوو کە زیاتر لە مانگێكە كۆمەڵێك هەرزەكار دەستدرێژی دەكەنە سەر ماڵەكەی و دەرگای ماڵەكەیان شكاندووە و هەڕەشەشیان لێكردووە و ژن و منداڵەكانی تووشی ترس و دڵەڕاوكێ بوونە و لەدوای ئاگاداركردنەوەی لایەنە ئەمنییەكانیش دەستدرێژیكردنەكە هەر بەردەوام بووە.
