چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆکی حکومەتی هەرێمی کوردستان سەردانی زاخۆی کرد و لەگەڵ بەرپرسانی ئیداری و کەسایەتییەکانی شارەکە کۆبووەوە و رایگەیاند “هەرچی لە تواناماندا بێت دەیکەین بۆ خزمەتکردنی ئەم دەڤەرە”.
دەقی راگەیەندراوی سەرۆکی حکومەت سەبارەت بە سەردانەکە:
ئەمڕۆ سێشەممە 2020/7/21 مەسرور بارزانی سەرۆکی حکومەتی هەرێمی کوردستان سەردانی شاری زاخۆی کرد و لە باڵەخانەی قایمقامیەتی زاخۆ، لەگەڵ بەرپرسانی ئیداری دەڤەرەکە کۆبووەوە.
لە کۆبوونەکەدا سەرۆکی حکومەت ئاماژەی بە گرنگیی و رۆڵی مێژوویی و شۆڕشگێڕانەی شاری زاخۆ و سنوورەکە بە گشتی و قوربانیدانەکانی کرد لە بزووتنەوەی رزگاریخوازی گەلی کوردستان و گوتی، شاری زاخۆ هاوشان لەگەڵ ناوچە و دەڤەرەکانی دیکەی کوردستان، شایستەی خزمەتکردنی زیاترە و هەرچی لە تواناماندا بێت دەیکەین بۆ خزمەتکردنی ئەم دەڤەرە.
سەرۆکی حکومەت بەرپرسانی ئیداری دەڤەرەکەی راسپارد بە بێ هیچ جیاوازییەک، خزمەتی هاووڵاتییان بکەن و داخوازی و سەرنج و تێبینی و گازەندەکانی هاووڵاتییان بە سینگێکی فراوانەوە وەربگرن.
پاشان سەرۆکی حکومەت لە گەڵ کەسایەتییەکانی شاری زاخۆ و کەسوکاری شەهیدانی دەڤەرە کۆبووەوە و ئاماژەی بە کارنامە و پلانەکانی حکومەت کرد بۆ خزمەتکردنی ناوچە و دەڤەرە جیاوازەکانی هەرێمی کوردستان و بەهێزکردنی ژێرخانی ئابووری و هەمەجۆرکردنی سەرچاوەکانی داهات و ئەنجامدانی چاکسازیی هەمەلایەنی کارگێڕی و ئابوورریی.
سەرۆکی حکومەت جەختی لەوە کردەوە کە یەکێک لە کارە لە پێشینەکانی حکومەتی هەرێم ، گرنگیدانە بە کەرتەکانی کشتوکاڵ و پیشەسازی و پشتگیریکردنی جووتیارانی هەرێمی کوردستان و بەرووبوومی ناوخۆییە بە شێوەیەک کە کۆمەڵگەی کوردستان لە بەکارهێنەرەوە ببێتە بەرهەمهێنەر.
سەرۆکی حکومەت بڕیاری ئەنجامدانی چەندین پڕۆژەی خزمەتگوزاریی لە سنووری قەزای زاخۆ راگەیاند کە بە پێی توانا داراییەکانی حکومەتی هەرێم بەم نزیکانە دەست بە جێبەجێ کردنیان دەکرێت. گوتیشی “کار دەکەین بۆ ئەوەی هەنگاوەکانی کردنی زاخۆ بە ئیدارەیەکی سەربەخۆ خێراتر بکەین”.
