چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
پەیامی پارتی چاکسازی تورکمان لە کۆمێنته
دواجار رەشنوسی رێککەوتنی نێوان حکومەتی هەرێم و حکومەتی فیدراڵ پەسەندکرا، بەهیواین رێککەوتنەکە بەردەوامی هەبێت و جارێکی تر بەغدا مووچەی فەرمانبەرانی هەرێم بە بارمتە نەگرێت و سیاسەتی برسیکردنی خەڵکی هەرێمی کوردستان پەیڕەو نەکات، لە ماوەی رابردوو حکومەتی هەرێم هەموو ئامادەیی و نەرمییەکی نواند بۆ رێککەوتن لەسەر پرسەکان نەوت و داهاتی نانەوتی و هەموو مەرج و داواکاری حکومەتی فیدراڵی بەغدای قەبوڵکردوە، بەرێز سەرۆکی حکومەت لەزۆر وێستگە و قۆناغی جیادا رایگەیاندوە کە ئەوان مووچەی فەرمانبەرانی کوردستان بە ئەولەویەتی کارەکانی حکومەت دەزانن و ئامادەن بۆ جێبەجێکردنی هەموو پابەندییەکی سەرشانیان و لەو پێناوەشدا هەوڵێکی بێ وچان و کارێکی مەزنی کرد کە دواجار بە ئەنجام گەیشت.
وەک پارتی چاکسازی تورکمان پێشوازی لەم رێککەوتنەی نێوان حکومەتی هەرێم و حکومەتی فیدراڵی عێراق دەکەین و هیوادارین چیتر مووچە و شایستە داراییەکانی هەرێم تێکەڵ بە کێشە سیاسی و ناکۆکی نەکرێت و دەستور و یاسا کارپێکراوەکان ببنە بنەما بۆ چارەسەرکردنی کێشەکان، هەروەها سوپاس و پێزانینمان بۆ هەموو ئەو لایەن و کەسانەی کە رۆڵیان هەبوە لە چارەسەرکردنی کێشەکان و رۆڵی سەرۆکی حکومەت و ئەندامانی ئەنجوومەنی وەزیران لە چارەسەرکردنی کێشەکان بەرز دەنرخێنین.
