چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لیژنەی تەناهیی سلێمانی ئاگادارییەكی بڵاو كردەوە و رای دەگەیەنێت، داواكارییەكانتان گەیشت و پێویست بە خۆپێشاندان ناكات.
ئەمڕۆ سێشەم 24ـی حوزەیران، لە ئاگادارییەكی لیژنەی تەناهیی سلێمانیدا هاتووە، ئێمە لە لیژنەی تەناهیی پارێزگای سلێمانی، پشتیوانی و پاڵپشتیی تەواوی خۆمان؛ بۆ ماف و داوا ڕەواكانی مامۆستایان و فەرمانبەران و مووچەخۆران بەگشتی؛ دەردەبڕین، باری دژواری ژیان و گوزەرانی مووەخۆران بەهۆی دواكەوتنی دابەشكردنی مووچەوە لەبەرچاو دەگرین.
باس لەوەش كراوە، لەگەڵ ئەوەشدا بەهەموو لایەكی رای دەگەیەنین؛ كە دەنگی مووچەخۆران و ناڕەزایەتییەكانیان، گەیشتووەتە هەموو دەسەڵاتەكانی هەرێمی كوردستان و عێراقی فیدراڵ، بەڵام ئەنجامدانی خۆپێشاندان و ناڕەزاییەتی لەم دۆخە هەستیارەی ناوچەكەی پێدا تێپەڕ دەبێت؛ گونجاو نابێت.
ئاماژە بەوەش كراوە، بۆیە وەك چۆن پێشتر هاوكار و هاوئاهەنگ بووین لە پرسی پاراستن و هێنانەكایەی ژینگەیەكی گونجاو بۆ خۆپێشاندان و سەلامەتیی گیانی خۆپێشاندەران، ئەمجارە بەسوپاس و پێزانینەوە داوا دەكەین؛ خۆپێشاندانەكە بۆ كاتێكی سەقامگیرتر دوابخەن تا هاوكار و هاوئاهەنگ بین لە گەیاندنی پەیامەكانیان بەشێوەیەكی شارستانیانە و دوور لەهەر ئەگەرێكی توندوتیژی و ڕووداوی نەخوازراو.
