چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مه‌سرور بارزانی، سه‌رۆكی حكومه‌تی هه‌رێمی كوردستان، په‌یامێكی سه‌ره‌خۆشی ئاراسته‌ی كه‌سوكاری شه‌هیدانی شه‌وی رابردووی گونده‌كانی مێخاس و دارای سنووری قه‌زای خانه‌قین ده‌كات، كه له هێرشێكی تیرۆریستان شه‌هید بوون.
سه‌رۆكی حكومه‌تی هه‌رێمی كوردستان، وێڕای ئاراسته‌كردنی سه‌ره‌خۆشی، جه‌خت له‌وه ده‌كاته‌وه، كه پێویسته به هه‌ماهه‌نگی و هاوكاری نێوان هێزی پێشمه‌رگه و سوپای عێراق، سەقامگیریی بۆ ئەو ناوچانە بگەڕێننەوە و سەروماڵی هەموو هاووڵاتییانی ناوچەکە بپارێزن.
شه‌وی رابردوو له په‌لامارێكی تیرۆریستان بۆ سه‌ر هه‌ردوو گوندی مێخاس و دارا، 7 هاووڵاتی ئه‌و دوو گونده، كه كاكه‌یی و كوردن، شه‌هید بوون و 5ی دیكه‌ش برینداربوون.
ده‌قی په‌یامه‌كه:
“بەداخەوە دوێنێ شەو لە ئەنجامی هێرشێکی تیرۆریستان بۆ سەر گوندەکانی دارا و مێخاس سەر بە قەزای خانەقین ژمارەیەک خوشک وبرای کاکەیی شەهید بوون و چەندین کەسی دیکەش برینداربوون. پرسە و سەرەخۆشی لە بنەماڵە و کەسوکاری ئەو شەهیدانە دەکەین و خوای مەزن گیانیان بە بەهەشت شاد بکات و هیوای چاکبوونەوەی خێراش بۆ بریندارەکان دەخوازین.
ئێمە لە کاتێکدا زۆر لە دۆخی ناسەقامگیریی ئەو ناوچانە نیگەرانین، لە هەمانکاتدا جەخت لە میکانیزمی ھاوکاریی ئەمنیی حکومەتی ھەرێمی کوردستان و حکومەتی فیدراڵی لە بەغدا و گرنگیی هەبوونی هێزی پێشمەرگە لەو ناوچانە دەکەینەوە بۆ ئەوەی بە هاوکاری و هەماهەنگی لەگەڵ سوپای عێراق، سەقامگیریی بۆ ئەو ناوچانە بگەڕێننەوە و سەروماڵی هەموو هاووڵاتییانی ناوچەکە بپارێزن.
مەسرور بارزانی
سەرۆکی حکومەتی هەرێمی کوردستان
