چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لە پەیامێكی هێمن هەورامی جێگری سەرۆكی پەرلەمانی كوردستاندا هاتووە، بە نیگەرانییەكی زۆر لە هەوڵی ژمارەیەك پەرلەمانتار لە لیژنەی دارایی پەرلەمانی عێراق دەڕوانین.
جێگری سەرۆكی پەرلەمان دەڵێت، دەستكاریكردنی ماف و شایستەكانی خەڵكی كوردستان و دەستبردن بۆ كەمكردنەوەی دەسەڵاتە دەستوورییەكانی هەرێمی كوردستان، هەڵەیەكی گەورەی دووبارەبووەوەیە، مێژوو سەلماندوویەتی هەمیشە هەوڵی خۆفەرزكردن و بەكارهێنانی لۆجیكی هێز، ئەنجامی پێچەوانەی لێ كەوتووەتەوە.
باسی لەوەش كردووە، هێز و لایەنە سیاسییەكان دەبێ لەوە تێبگەن كە ماف و ئەركی هاووڵاتییان و بەشێكی وڵات، بەخۆ لە بۆسەدانان و دانانەوەی مینی سیاسی وەدی نایەت، بەڵكو ماڵوێرانی زیاتری بەدواوە دێت.
روونی كردووەتەوە، خەڵكی كوردستان و هەموو عێراق دڵخۆش و ئاسوودە بوون بەو پێشڤەچوون و لەیەكنزیكبوونەوەی هەردوو حكوومەتی ناوەند و هەرێم، ئومێدێكی گەورە بۆ كۆتاپێهێنانی كێشەكان لە ئارادا بوو، بەڵام وەك هەمیشە چەند تاقمێك دووبارە دەیانەوێت بمانگێڕنەوە بۆ خاڵی سەرەتایی كێشەكان، ئەوان نان و ژیانیان هەر لە گێژاو دەست دەكەوێت، دەزانن بە چارەسەری ئاشتییانە و كۆتایی قەیرانەكان، ڕاستیی ئەوانیش دەردەكەوێت و كۆتاییان پێ دێت.
“لێرەوە داوا لە حكوومەت و پەرلەمانی عێراق دەكەین نیازپاكیی خۆیان بسەلمێنن و بەپێی ڕێككەوتنی نێوان هەردوو حكوومەت، كۆتایی بەو كێشانەش بهێنرێت و ئاهێكی ئاسوودەیی بە دڵی هەموو خەڵك بهێنرێت. پێویستە هەموو ئەو لایەنانەی كە بەشداربوون لە پێكهێنانی حكوومەت، پابەندی بەڵینەكان بن و بەڵێنەكانیان ببەنە سەر”. هێمن هەورامی جێگری سەرۆكی پەرلەمان وای نووسیوە.
