چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
گوتەبێژی وەزارەتی تەندروستیی هەرێمی کوردستان راگەیاند پرۆسەی كەرەنتینكردن لەسەر خەرجی ئەو كەسانەی لە دەرەوەی هەرێمی كوردستان دەگەڕێنەوە دەستیپێكردوە گوتی ئەوانەی لە شارەكانی عێراقە دەگەڕێنەوە هەرێمی كوردستان 48 كاژێر و ئەوانەش لە دەرەوەی عێراق دەگەڕێنەوە 14رۆژ كەرەنتین دەكرێن”.
د.محەممەد قادر خۆشناو، گوتەبێژی وەزارەتی تەندروستی، راگەیاند پرۆسەی كەرەنتینكردن لەسەر خەرجی كەسە گەڕاوەكانی دەرەوە دەستیپێكرد و گوتی: “پرۆسەی كەرەنتینكردن لەسەر خەرجی كەسەكان لە پارێزگای دهۆك چووەتە بواری جێبەجێكردنەوە و لە سلێمانی و هەولێریش دەستپێدەكات تەنیا خەرجی مانەوە لەسەر كەسەكانە پشكنینەكان لەسەر خەرجی وەزارەتی تەندروستی دەبێت”.
گوتەبێژی وەزارەتی تەندروستی ئەوەشی خستەڕوو، ماوەی پرۆسەی كەرەنتینكردن دوو جۆرە و گوتی “هەموو ئەوانەی لەشارەكانی عێراقەوە دەگەڕێنەوە هەرێمی كوردستان 48 كاژێر و ئەوانەش لە دەرەوەی عێراقەوە دەگەڕێنەوە 14 رۆژ كەرەنتین دەكرێن”.
بەپێی دوایین ئاماری وەزارەتی تەندروستیی حکومەتی هەرێمی کوردستان تائێستا 12 هەزار و 422 هاووڵاتی کە لە دەرەوە گەڕاونەتەوە، کەرەنتین کراون. ئێستا تەنیا هەزار و 58 هاووڵاتی لە 33 شوێنی جیاوازی کەرەنتین ماونەتەوە؛ 181 لە هەولێر، 63 لە سلێمانی، 814 لە دهۆك.
