چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
.
شەوی ڕابردوو لە قەزای ڕانیەی سەر بە ئیدارەی ڕاپەڕین لە پارێزگای سلێمانی کچێک لە ماڵەکەی خۆیاندا بە فیشەک کوژرا.
شۆڕش اسماعیل وتەبێژی بەڕێوەبەرایەتی پۆلیسی ڕاپەڕین بە چرکە میدیای ڕاگەیاند: کچێک بەناوی (شەیما ئەیوب) بەهۆی کێشەیەکی کۆمەڵایەتی کە پەیوەندی بە خۆشەویستییەوە هەبووە لەگەڵ کوڕێک بەناوی (سیروان عومەر)، لەلایەن کەس و کارەکەیەوە بە فیشەک کوژراوە.
وتەبێژی بەڕێوەبەرایەتی پۆلیسی ڕاپەڕین وتیشی: هەر بەهۆی ئەو پەیوەندییە خۆشەویستییەوە، پێشتر کچەکە لەلایەن کەس و کارەکەیەوە ئازار دراوە و کچەکەش بە مەبەستی داڵدەدان و لەترسی ماڵەوەیان پەیوەندی بە بەڕێوەبەرایەتی بەرەنگاربونەوەی توندوتیژی خێزانی ڕاپەڕینەوە کردبوو.
لای خۆشییەوە لوقمان حاجی قادر بەڕێوەبەری نوسینگەی مافی مرۆڤی ڕاپەڕین بۆ چرکە میدیا وتی: باوکی شەیما کەسێکی بەدەسەڵاتی سنورەکەیە و توانیویەتی کچەکەی لە شێڵتەری داڵدەدانی ئافرەتان وەربگرێتەوە و دوای چەند ڕۆژێک بێ حساب کردن بۆ یاسا کچەکەیان کوشتووە.
ڕابەر جەلال لێپرسراوی سەنتەری توندوتیژی لە بەڕێوەبەرایەتی بەرەنگاربونەوەی توندوتیژی خێزانی ڕاپەڕین ئەوەی بۆ چرکە میدیا پشتڕاستکردەوە و وتی: ئەو کچەی کە شەوی ڕابردو کوژراوە، هانای بۆ لای ئەوان هێناوە و ماوەیەک لە بەڕێوەبەرایەتییەکەیان ماوەتەوە لە ترسی ماڵەوەیان، بەڵام بەڵێننامەیان بە کەس و کارەکەی پڕکردەوە کە ئازاری نادەن و نابنە مەترسی بۆسەر ژیانی، بەو مەرجە ڕادەستمان کردنەوە.
لە سەرەتای ساڵەوە تا ئێستا (٩)کەس بەهۆی کێشە کۆمەڵایەتییەکان لەسنوری ئیدارەی ڕاپەڕین کوژراون و لەناویاندا (٣) ئافرەت لایەن کەس و کار و هاوسەرەکانیانەوە کوژراون.
کوشتنی (شەیما)ش دەبێتە چوارەم ئافرەت لەسنورەکە کە لەشەش مانگی یەکەمی ئەمساڵدا کوژراون.
