چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
کوردستان و وڵاتانى یەکێتىی ئەوروپا دەڕواتە قۆناخێکى نوێ
لە ڕوانگەی پەیوەندییە نێودەوڵەتی و دیپلۆماسییەکانەوە، ھەر جووڵەیەکی سیاسی، یان دیپلۆماسیی نێوان وڵاتان، گرنگی و تایبەتمەندیی خۆی ھەیە، زۆربەی کات ئەو پەیوەندییانە پەل دەھاوێن بە برەودان بە ھەموو ئەو پێشهات و ئاڵوگۆڕە سیاسی و ئابوورییانەی کە لەئارادان، بەڵام سەردانەکەی (کاتالین نۆڤاک) سەرۆکی ھەنگاریا لەم قۆناغە و دیدار لەگەڵ سەرۆکی ھەرێمی کوردستان و مەسرور بارزانی، سەرۆکی حکوومەتی ھەرێمی کوردستان، چەندین بەھای گرنگی ھەیە، لەکاتێکدا عێراق و ناوچەکە بە دۆخێکی ناھەموار و ناسەقامگیردا تێدەپەڕن، کاتالین نۆڤاک و بەھۆی گەنجی و توانا و شارەزاییەکانی لە سیاسەتی نێودەوڵەتیدا، زۆرینەی وڵاتان ئومیدیان پێیەتی.
سەرۆکی ھەنگاریا لە سەردانەکەیدا، ئاماژەی بە بایەخی سەقامگیری و ئارامیی ھەرێمی کوردستان بە لای وڵاتەكەیەوە داوە، جەختیش لەوە دەکاتەوە کە دەبێ پەرە بە پەیوەندیی مێژوویی نێوان ھەردوولا بدرێت و بەھێز بکرێت.
خاڵێکی دیکەی، کە شیاوی ھەڵوەستە لەسەرکردنە، ئاماژەدان بە ڕووبەڕوونەوەی تیرۆر کە تا ئێستاش ھەنگاریا، ھەرێمی کوردستان بە ھاوبەشێکی کارا و گەورەی خۆی لە بەگژداچوونەوەی ھەموو ئەو ئالنگارییانەی لە ناوچە دێنە پێش، دەبینێت. کاتالین نۆڤاک ئاماژەی بەوە دا کە لە ھەرێمی کوردستان ھەست بە ئاسایش و سەقامگیری دەکات، خستنەڕووی ئەم ڕاستییەش بۆ کۆمەڵگەی نێودەوڵەتی و دونیای دەرەوە، دەرگای دیکەی باشتری دیپلۆماسی بە ڕووی ھەرێمی کوردستاندا دەکاتەوە.
