مەسرور بارزانی پێشوازیی لە باڵیۆزی کۆماری چین لە عێراق کرد

مەسرور بارزانی پێشوازیی لە باڵیۆزی کۆماری چین لە عێراق کرد
ئەمڕۆ مەسرور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە چین ویتچینگ باڵیۆزی کۆماری چین لە بەغدا و شاندی یاوەری کرد.

لەم دیدارەدا دوا رەوشی ناوچەکە و پەیوەندیيەکانی چین لەگەڵ هەرێمی کوردستان و رێکارەکانی پێشخستنی ئەو پەیوەندیانە تاوتوێکران.

باڵیۆزی چینی ستایشی رۆڵی هەرێمی لە بەرەنگاربوونەوەی تیرۆریزم کرد و وتی: "هەرێم لە دابین کردنی ئارامی و ئاسایش سەرکەوتوو بووە ئەمەشیان زەمینەیەکی لەبار دروست دەکات بۆ ئەوەی هەرێم لە گشت بوارەکانی تر سەر لە نوێ رێگەی پێشکەوتنی زیاتر بگرێتەبەر".

باڵیۆزی چین ئاماژەی بەوە دا کە وڵاتەکەی خوازیارە لە ڕووی ئابووری و کولتووریيەوە پەیوەندیی فراوانتری لەگەڵ هەرێمی کوردستان هەبێت.

لە بەرامبەردا، مەسرور بارزانی خواستى هەرێمی کوردستانی بۆ فراوانترکردنی پەیوەندیيە هەمەچەشنەکانی هەرێم لەگەڵ چین دەربڕی و ئاماژەی بە ئەوەدا کە کۆماری میللیی چین لە ئاستی نێودەوڵەتیدا پێگەیەکی بەهێزی هەیە و خوازیارین ئەم پێگە کارایە بۆ چارەسەریی کێشە چەقبەستوەکان و سەقامگیریی زیاتری ناوچەکە بەکار بهێنن.