عیرفان عەلی عەبدولعەزیز ئارەزووەكانی عەلی باپیر بەدیدەهێنێت

2015 Jun 17

avatar
عیرفان عەلی عەبدولعەزیز ئارەزووەكانی عەلی باپیر بەدیدەهێنێت
ژین مەحمود
پاش جودابوونەوەی عەلی باپیر لە بزووتنەوەی ئیسلامی‌و وەك خۆی گوتەنی ماڵی عەلی عەبدولعەزیزن ئیدی لە دەستپێكی دوو هەزارەكانەوە كۆمەڵی ئیسلامی بە ئەمیرایەتی عەلی باپیر و بزووتنەوەی ئیسلامی بە رابەرایەتی شێخ عەلی عەبدولعەزیز لەلایەكی دیكە لەباشووری كوردستاندا درێژەیان بە كاری سیاسی خۆیان دا. كۆمەڵ هەر لەسەرەتاوە هەرچەند لە بزووتنەوە جودا ببووەوە، بەڵام دەستی بەسەر تەواوی بارەگا و بنكە و جەماوەر و كادیرە هەوەڵینەكانی بزووتنەوەی ئیسلامیدا گرت و بووە میراتگری بەشی هەرە زۆری رابردووی ئەو حزبە، هاوكات بزووتنەوەی ئیسلامی پاش كۆچی دوایی مەلا عەلی سدیقی برای بووە رابەر و پاش ماوەیەك لە دوایین كۆنگرەدا عیرفانی كوڕی مەلا عەلییان كردە رابەری بزووتنەوە، عیرفان پێشووتر لە نەوەدەكاندا وەك لاوێكی تازە پێگەیشتوو كە كوڕی دووەمی مەلا عەلی بوو دەسەڵاتێكی بەرینی هەبوو، ئەو ببووە لێپرسراوی دەزگای هێمنایەتی بزووتنەوە، هەر بۆیە تەواوی سەرەداوەكانی هەواڵگری ‌و پەیوەندییە ژێربەژێرییەكان ‌و كۆنترۆڵكردنی نەیارانی بزووتنەوە و لەناوبردنی نەیارەكان بە فەرمانی عیرفان بوو، عیرفان سەردەمێك لە ئێران ‌و پاشان لە بەریتانیا ژیاوە، ئەو رەگەزنامەی بەریتانی هەیە و بەشێكی تەمەنی لەوێ‌ بەسەر بردووە. هەر بۆیە پاش ئەوەی عەلی باپیر جودا دەبێتەوە زیاتر حەمەی برای لەململانێكاندا دەبێت ‌و لە سیاسەت ‌و ستراتیژدا سەرپەرشتی بابە پیرەكەی دەكات.
هەر بۆیە بەبڕوای بەشێكی زۆر لە چاودێرانی ئەو بوارە بەشێكی نەهامەتییەكانی بزووتنەوە دەگەڕێننەوە بۆ كارە هەڵەكانی حەمەی مەلا عەلی. هەر چەند گرفتی عەلی باپیر و حەمەی مەلا عەلی پێش ئەوەی گرفتێكی سیاسی بێت گرفتێكی كۆمەڵایەتی بوو، چوون محەمەدی مەلا عەلی خزمایەتیكردنی عەلی باپیری بۆ بنەماڵەكەیان دایە دواوە.
لەبەر ئەوە عیرفان لەچاو ئەودا هەم لەلای جەماوەری بزووتنەوە بێ‌ كێشەتر بوو، هەمیش حزبە ئیسلامییەكان ئەویان بە پەسەندتر دەزانی ‌و پێیان وابوو بە ئەزموونتر و لۆژیكیترە و دیكۆرێكی دیارتر دەداتە سەركردایەتی ‌و رابەرایەتی بزووتنەوە.
لەبەر ئەوە عیرفان دەستی بەسەر جومگە سەرەكییەكانی رێكخستنی بزووتنەوەدا گرت و بەشێكی بنەماڵەكەی بەرز كردەوە، وەك ئیحسانی برای ‌و مونیرەی خوشكی، بەشێكیشی دوورخستەوە وەك مەلا سدیقی مامی، بەجۆرێك مەلا سدیق هێندە نیگەران بوو لەو پیاوە كە برازای بوو، بە ئاشكرا رایگەیاند كە عیرفان روو لەخوا نییە و تەنانەت نوێژ ناكات. هەروەها مەلا محەمەد عومەریشی دوورخستەوە كە ئەویش لە پاش مەلا عەلی ببووە رابەری بزووتنەوەی ئیسلامی، هاوكات تەواوی خانەوادەی مەلا عوسمانی تۆراند.
لەلایەكی دیكەوە دەستی بە سەر ئابووری ‌و راگەیاندن ‌و پەیوەندییەكانی بزووتنەوەدا گرت. عیرفان بۆ خۆی ئێستە لەتەك ئیحسانی برای ‌و محەمەدی براگەورەی ‌و مونیرەی خوشكیدا هەوەڵ ‌و كۆتایی بزووتنەوەن. سەبارەت بە مەكانەتی ئەم حزبە لە كوردستاندا لەوپەڕی لاوازیدایە. تەنانەت لە هەڵبژاردنەكاندا فرە لەدوای كۆمەڵ ‌و یەكگرتوو هاتن ‌و لە ریزی حزبە هەرە بچووكەكاندایە. ئەوەی ئێستا لە میكانیزمی كاری عیرفاندایە بە تەواوی دڵپەسەندی عەلی باپیرە. چوون عەلی باپیر پاش جودابوونەوەی تەنیا مەترسی ئەوە بوو كە بزووتنەوە هەستێتەوە، لەگەڵ هەر هەستانەوەیەكیشی عەلی باپیر و میدیاكەی دژ بە بزووتنەوە كەوتوونەتە خۆ.
لەبەر ئەوە ئەو ئومێدەی بە عیرفان درابوو بۆ ئەوەی بزووتنەوە هەستێنێتەوە، هەمووی بە كامی دڵی عەلی باپیر بوو.
چوون عەلی باپیر دەیزانی ئەگەر بچووكترین دڵسۆزی ‌و كار و چالاكی ‌و میدیایەكی زیندوو هەبێت، بزووتنەوە ئەگەری هەستانەوەی فرە لەحزبە ئیسلامییەكانی دیكە زیاترە. هەر بۆیە ترسەكەیشی لە جێی خۆیدا بوو. بەڵام ئەوەی عیرفان دەیكات لەرووی كاری رێكخستن ‌و ململانێی ناوخۆیی ‌و تەراتێنی ئابووری ‌و دوورخستنەوەی كەسە دڵسۆزەكان ‌و سستی ‌و لاوازی رێكخستن ‌و فەرامۆشكردنی بنەماڵەی شەهیدان ‌و نەبوونی سیاسەتێكی حەكیمانە هەموو ئەمانە عیرفان فرە بەلاوازی دەستی بۆ بردوون ‌و لە هیچ بۆنە و مەراسیم ‌و چالاكییەكدا ناوی نییە. لەبەر ئەوە عەلی باپیر بە بڕوای چاودێران تەواوی ئارەزووەكانی لەسەر ونكردنی شوێنەواری ناوی بزووتنەوە لەسەر دەستی خودی مامۆستا عیرفانی مەلا عەلیدا هاتووەتە دی ‌و جێبەجێكراوە و ئێستەكانێ‌ زۆر روونە كە عەلی باپیر بە رابەرێكی وەك عیرفان مەلا عەلی لە پۆستی یەكەمی بزووتنەوەدا كەیفخۆشە.
راپۆت